خلاص عقلك أقتنع بالفكرة وصدقها كأنها حقيقة فعلا
مثلا عايز تسافر برا ومش معاك فلوس و العملية صعبة و الدنيا سودة كحلى خالص هتعمل ايه؟
ربنا قال فى القران
“ان الله لا يغير ما بقوم حتى يغيروا ما بأنفسهم”
هو ده قانون الجذب ببساطة غير اللى جوا نفسك الاول يعنى الحاجات اللى انت معتقد فيها و كل ظروفك هتتغير يعنى شيل كلمة الظروف دى خالص من حياتك انت المسئول عن حياتك و اللى انت فيه انت السبب فيه و بأيدك تغيره برده
اتكلمت عن فكرة التكرار عشان تثبت الفكرة فى دماغك و عقلك الباطن يقتنع بيها فأى حاجة عايزاها فلوس شغل جواز هتركز على الفكرة الاول هتكرر الحاجة اللى انت عايزاها على قد ما تقدر لو تعرف مثلا تفكر كل يوم فيها قبل ما تنام يبقى تمام كل ما التفكير يزيد بجانب التكرار كل ما سرعة الجذب تزيد
اول حاجة هتلاحظها أنك بدأت تجذب معلومات كتير عن الحاجة دى من غير مجهود منك
هتلاقيك بتكعبل فى الحاجة دى كده فى طريقك كل يوم هتلاقى المعلومات دى هتزيد أكتر و أكتر
طول ما أنت مركز على الحاجة دى
يعنى مثلا لو عايز تسافر أمريكا هتلاقيك جذبت كل المعلومات عنها
عرفت كل الحاجات اللى ممكن تعملها عشان تسافر
انت دلوقتى فى مرحلة جمع المعلومات و التركيز على الفكرة
أوعى تفكر فى أزاى ده هيحصل و انا عاطل و مش معايا فلوس و هسافر ازاى كده انت بتفتح طريق الافكار السلبية وهو مش طريق دى مجارى سورى يعنى فى اللفظ
افكار سلبية ريحتها وحشة هتتسرب لعقلك الباطن هتصدقها خلاص كده انت رجعت لنقطة الصفر تانى !!
احنا معظمنا بيميل لتصديق الافكار السلبية بسرعة أكبر من الافكار الايجابية!!
فى شوية حاجات زى السلطات جنب الاكل كده بتفتح النفس هنا فى قانون الجذب بتسرعه و بتخلى الحاجة تحصل زى ما انت عايز بالظبط
1-المشاعر القوية
عارف كلمة Passion بالانجلش?
يعنى عاطفة جياشة انت محتاج عاطفة جياشة عشان تجذب الفكرة أسرع المشاعر عاملة زى البنزين بالظبط يعنى انت مثلا قاعد فى عربية ممكن تمشى بالزق لكن لو معاك بنزين هتطير طبعا
المشاعر هى البنزين اللى انت محتاجله جدا عشان توصل اسرع لهدفك
فالقاعدة بتقول مشاعر قوية+فكرة مسيطرة على دماغك=هوس!
اللى هو بالانجلش obsession
بتسمع عن ناس مهوسة بالshopping
وناس مهوسة بالكرة الخ
انت هدفك بالنسبة لك لازم يكون هوس بأنك تزود مشاعر أيجابية كتير ناحية الفكرة كل ما تحبها أكتر كل ما هتجذبها أسرع تمام كده
2-التخيل
التصور أو التخيل اسمه Visualization
الخيال ليه دور كبير جدا فى تسريع قانون الجذب
و الحمد لله دى أسهل حاجة ممكن تعملها فى أى وقت من غير أى مجهود
المطلوب منك أنك تتخيل الهدف اللى انت عايز توصله بكل تفاصيله كأن بتتفرج على فيلم بالألوان و3D كمان
لازم الصورة تبقى واضحة أوى بالنسبة لك تخيل خلاص انك حققت الهدف شوف نفسك فى المكان و انت حاسس بأيه مبسوط متفائل مستريح
لازم المشاعر تبقى ايجابية طبعا
كل ما قدرت تتخيل أكتر كل ما عقلك سجل الصورة فى العقل الباطن و أقتنع بأنها حقيقة و هيحققها زى ما أنت عايز
ميزة العقل الباطن انه مش بيفرق ما بين الحقيقة و الخيال
زى ما بتفترج على فيلم رعب مثلا ضربات قلبك و بتزيد و بتخاف جدا كأنك فى خطر
لأن العقل الباطن شايف ان ده حقيقى
فالقاعدة بتقول
تخيل + مشاعر ايجابية قوية = صورة عقلية واضحة للهدف
3- Affirmations تواكيدت
التوكيدات عبارة عن جمل ايجابية قصيرة بتقراها او بتكرارها كل يوم عشان تثبت الفكرة فى عقلك
وهى نفس فكرة التكرار اللى قلنا عنها فى الاول
ممكن تلاقى جمل كتير جاهزة لو عملت بحث على النت او ممكن تكتب الجمل ديه بنفسك
مثلا
I’m good enough I always get what I want
انا كويس بما فيه الكفايه أنا ديما بحصل على ما أريد
4-Gradidtue الاحساس بالرضا والشكر
دى أخطر و أهم حاجة ما ينفعش تكون بتحلم بحاجة و نفسك تحققها و أنت مش راضى عن حياتك
هبسطها أكتر يعنى الحاجة اللى انت عايزاها محتاجة طاقة ايجابية عالية عشان تجذبها لحياتك
و انت لو كاره حياتك و كل يوم تلعن فى العيشة واللى عشيانها و مش طايق البلد و عندك حالة قرف كل دى طاقة سلبية جدا هتجذب طاقة سلبية زيها
الحاجة الايجابية محتاجة طاقة ايجابية زيها عشان تجذبها
يعنى كل يوم الصبح تقول الحمد لله و تشكر ربنا ديما و تركز على الحاجات الايجابية فى حياتك
الرضا مهم جدا ومن ناحية دينية كمان ربنا بيقول الانسان اللى بيشكر نعمة ربنا عليه بيزوده
((وَإِذْ تَأَذَّنَ رَبُّكُمْ لَئِنْ شَكَرْتُمْ لَأَزِيدَنَّكُمْ ))
يعنى من غير رضا عن حياتك او الحياة بشكل عام القانون مش هيشتغل حتى لو عملت كل اللى فات صح
فأذكر ديما نعمة ربنا عليك وأنك أحسن من ناس كتير وقول الحمد لله وانت راضى وقلبك مطمئن
مش تقول يلا انا هصبر و خلاص لأ لازم يكون فى سلام داخلى جواك inner peace
طب انت عملت كل حاجة فوق صح و كله تمام فاضل أخر و أهم خطوة
الترك Let it go
دى أصعب خطوة لاننا لما بنبقى عايزين حاجة بنتمسك بيها قوى و بنتعلق بيها لدرجة من الصعب ان احنا نسبها
تسبها بمعنى انك مش تفضل مستنى و تعيش حياتك عادى
لان كلنا بنقى عايزين كل حاجة دلوقتى و النهاردة قبل بكرة
فى قانون الجذب بيقولك سبها عشان الكون كله بيتحرك عشان يحقق لك الهدف لكن فى الوقت المناسب
هدفك هيتحقق فى الوقت المناسب حتى لو بعد سنة او اتنين المهم هتحس ساعتها ان الحاجة دى جت فى وقتها!
المدهش انك ساعات هتحصل على حاجات احسن و أفضل بكتير مما كنت تتخيل !
فالوقت امتى ده هيحصل؟ مش شغلك
الايمان و الثقة فى ربنا مطلوبة برده لان ربنا مسخر لينا الكون ده كله فالمفروض نطلب اللى احنا عايزينه و بعدين نسيب الموضوع يجى فى وقته
ربنا خلق الكون ده فى نظام دقيق مدهش و فى قوانين للكون ده بيمشى عليها و قانون الجذب واحد من أهم القوانين فى الكون و أكيد فى قوانين تانية كتير مش عارفين عنها حاجة
يا رب أكون فدتكم ربنا يوفقكم و تجذبوا كل الحاجات و الاهداف الايجابية لحياتكم
